Vou, Vero Rubio. La elegancia d’una artista del país

La primer noticia que muitos de nós tuviemos de l’artista Vero Rubio (Cangas, 1981) foi conocela por ser la ganadora del “Premiu Camaretá al Meyor Cantar” na edición del añu 2023 col títulu “Dixo miou padre”. Si bien ía verdá que’l sou l.labor quedóu bien retratáu daquel.la, la sua presentación pal gran públicu completóuse dafeitu al poder escuitar, ver, ya l.leer lo que nos ofrez en Vou (Xestión editorial d’Ediciones Trabe, 2025), un l.libru-discu -ya dalgunas cousas más- nel qu’axunta once temas colos que quier esplicar quién ía el.la ya con qué talante entiende’l mundu que tien alredor. Al andar ponte las páxinas de Vou alcontramos confesiones, reflexones, l.letras, poesías, partituras, fotos ya códigos QR pa escuitar ya ver cada pieza. Al sentir los sones qu’axeitóu ya mirar las imáxenes que dan fondu a la música, tolas partes encaxan con harmonía. A lo menos una vez, ía preciso deixase guiar, disfrutar de la propuesta entera ya restrexar tolas estaxas artísticas colas que s’avía esti trabayu con vocación de totalidá.

Vero Rubio ía música de formación académica ya con esperiencia profesional. Eiquí apurre con remangu’l sou oficiu como multiinstrumentista qu’interpreta los sous temas (a nun ser uno que vien d’una melodía tradicional), a la vera d’outros virtuosos: nesta orquesta sonan con elegancia pianu, harmoniu, tecláu, fliscornu, trompas, trompetas, bodhram, flauta (Pepín de Muñalén), violín (Miguel García, Juanjo Marqués), violas (Mónica Jivanescu, Cristina Gestido), violonchelu (Javier San Marcos, Paula Menéndez) ya tabla india (Javier Bergia). Pero nun ía abondo falar d’una música que compuén ya toca, porque nesti l.libru tamién hai una escritora que quier usar la l.lingua del sou l.lugar pa chegar a la esencia de la emoción, pa ser más verdadera, ya que lo canta con una voz guapísima, acompañada alcuando por Anabel Santiago, Puri Penín ya’l coru femenín Siset.

Vero Rubio ía una poeta esitencial qu’escuéi’l camín de la l.lírica popular; las l.letras de los cantares tán feitas encadenando repeticiones, paralelismos ya anáforas p’algamar el ritmu que se precisa. Canta a temas altos, a la vida ya la muerte, a la tranquilidá primeiro que la felicidá, al amor del compañeiru de vida ya al del gatín nel qu’adora; alcuentra fuercia nos raizones familiares, nel l.lugar, nos amigos (atoupa la complicidá col sou pensamientu nel poema “el día”, de Miguel Rodríguez Monteavaro); aprende a tomar un determín ya sal en reduñas de la suerte: “¿Por quéi you nun vou cantar? / Miou camín nun ta feitu, / moiu camín nun ta puestu. / You nun necesito sendeiru, / you nun quiero velu”. Fai de la tristura ya la desolación emociones estéticamente guapas; versiona’l carpe diem, l’aurea mediocritas, el locus amoenus, l’ubi sunt… cola esposición cenciel.la del qu’entiende y esplica lo importante ensin necesidá d’usar la grandilocuencia; sabe conmover igual colos tópicos clásicos que col deliriu corriente.

Pa esta banda sonora, la fotógrafa necesita semeyas ya imáxenes en movimientu qu’inda fan que miedre muito más tolo que yá se conoz. Por eso, cola ayuda d’Arturo Santiago, graba amodo una película, a color ya en blanco ya negro: presenta a Indi, anda polos mesmos praos ya caminos qu’andó de nena, mira pa cielos claros ou con nubes, pa la yerba ya las flores, p’altas canas d’árboles na seronda, pa gotas d’augua que can n’augua, pal sol pasando ponte las fueyas de los árboles. Tamién chega al paisaxe urbanu ya repara no tráficu al amanecerín ou vei detrás de la l.luna pola ciudá. Canta, con tantísimu respetu, delantre de ventanas que nun van volver abrise más.

Facenos entender l’orde col que rexistra tolo qu’hai na redolada cuido qu’ía la esmolición esencial de Vero Rubio y eiquí ta’l resultáu d’esa intención, que véamos cómo peneira tolos estímulos que significan daqué na sua motivación artística ya que dan forma a esti productu multisensorial que l.leva la sua firma: “Ya you pouco a pouco, / fui deixando tanto de sentir, / pa facer las mías cousas, al miou aire”. Un urdidoiru bien feitu.

---

Dixo miou padre, una de las 11 piezas que forman parte de Vou, primer trabajo en solitario de Vero Rubio: un disco y un libro de música en asturiano.